மூவரும் ஒருவரே

மூவரும் ஒருவரே
ஆதிப் பிரானும் அணிமணி வண்ணனும்
ஆதிக் கமலத்து அலர்மிசை யானும்
சோதிக்கில் மூன்றும் தொடர்ச்சியில் ஒன்றுஎனார்
பேதித்து உலகம் பிணங்குகின் றார்களே.

விளக்கம்:
 உலகத் தோற்றத்திற்கு மூல முதல் காரணமான உருத்திரனும், அழகிய ஆடை ஆபரணங்கள் அணிந்திருக்கும், நீலமணி வண்ணமுடைத் திருமாலும், உயிர்களைப் படைப்பவனாகிய தாமரை மலர் மேல் இருக்கின்றவனான பிரமனும், ஆகிய மூவரையும் எண்ணிப் பார்த்தால் இம்மூவரும் படைத்தல், காத்தல், அழித்தல் என்னும் மூன்று செயல்களால் வேறானாலும், மூவரும் ஒரு மூலப் பரம்பொருளான சிவமே என்பதை உணராமல், இவர்கள் மூவரும் வேறு வேறு என்று வித்தியாசப்படுத்தி, உலகத்தவர் மோதி முரணுகிரார்களே!